Thaçi gëzon më shumë besim për president

[size=18]Veprimtari i çështjes kombëtare, Bedri Islami, në këtë intervistë për “Epokën e re” ka folur për situatën e fundit politike në Kosovë.

Ai ka thënë se është gjë e mirë që opozita në Kosovë është e bashkuar por, sipas këndvështrimit të tij politik, opozita duhet ta zhvendosë protestën e saj në sheshe, por në parlament ta shpalosë vizionin e saj, mendimin e saj politik. “Personalisht, si një njeri që pjesë të rëndësishme të jetës i ka lidhur me Kosovën, mendoj, e ky është krejtësisht mendimi im, që nuk ka lidhje me asgjë tjetër, se edhe vetë struktura brenda Qeverisë së Kosovës, sidomos brenda PDK-së, e di se miratimi i Asociacionit të komunave me shumicë serbe, apo Demarkacioni me Malin e Zi, nuk kërkojnë ngutje, se duhet të rishikohen qetësisht, sepse jo gjithherë opozita ka gabuar. Nga ana tjetër, jam i bindur se, edhe nëse nuk do të ishte ky shkaku i protestave, opozita do të gjente një kauzë tjetër, të cilën e ka dëshmuar prej kohësh”, ka thënë Islami.

Ai ka thënë se gjërat mund të zgjidhen nëse secila palë e di të vërtetën se Kosova nuk është as vetëm e Qeverisë, as vetëm e opozitës, as vetëm e shumicës parlamentare: është e të gjithëve. Duke folur për punën e kësaj Qeverie, Islami ka thënë se Qeveria e sotme nuk mund të gjykohet, aq më pak të përgëzohet për atë që ka bërë për një vit, sepse në një vit, edhe po të vinte Obama apo Merkeli, nuk mund t’i zgjidhte hallet e Kosovës. “E keqja është se Qeveria e ndjen veten si në kalim e sipër, pasi ka ardhur pas një marrëveshje fluturake, në të cilën synimet janë përcaktuar nga postet dhe pas së cilës ajo që ka humbur është PDK-ja. Në Qeverinë e tashme mungon vullneti për të bërë diçka të guximshme, për të dalë mbi veten e hallet e tyre vetjake. Pa dashje të rikthehem në një temë të rrahur edhe më herët, ajo që po ndodh sot me Qeverinë është se edhe vetë Qeveria nuk e beson se është në pushtet”, ka thënë ai.

Veprimtari i çështjes kombëtare, Bedri Islami, ka shtuar se gjendja në Kosovë është rënduar, se shpresa po shkon drejt shuarjes, besimi tek shteti po venitet dhe faji nuk është jetim, as i vetëm njërës palë. Në këtë intervistë Islami ka folur edhe për zgjedhjen e presidentit të vendit. Ai ka thënë se Hashim Thaçin e njeh prej 20 vjetëve ashtu siç i njeh shumë nga liderët e sotëm, të cilët, sipas tij, ose kanë ardhur drejtpërdrejt nga lëvizja çlirimtare, ose janë bërë pjesë e saj në vitet e mëvonshme. Islami ka thënë se Thaçi ka pasur disa stacione në jetën e tij, në të cilën ka dëshmuar forcë karakteri, ashtu siç i ka edhe dritëhijet e tij në politikë. “Sidoqoftë, duan apo nuk duan, sot për sot Hashim Thaçi është politikani më i votuar në Kosovë. Nga vëzhgimet dhe informacionet e deritashme, jam i bindur se edhe diplomacia ndërkombëtare nuk e konteston kandidimin dhe zgjedhjen e tij”, ka thënë Islami.

I pyetur se a do t’i bënte nder vendit që z. Thaçi të jetë president, Islami është përgjigjur. “Do ta shtroja pyetjen ndryshe: nëse nuk është Hashim Thaçi, kush do të jetë? Në të vërtetë jemi në një kohë kur Kosova nuk varet nga njëshi, por pyetja përsëri mbetet: cili gëzon besim më shumë se ai? Më vjen keq ta them, askush. Në Kosovë, tre liderët e opozitës së bashku, dy nga të cilët janë miq të mi të afërt dhe u besoj për gjithçka, nuk kanë aq vota sa kishte Thaçi në zgjedhjet e fundit. Nuk mund të përmbysësh të vërtetën duke u thirrur në atë që mendon se do të ndodhë”.

“Epoka e re”: Z. Islami, si po i shihni zhvillimet e fundit politike në Kosovë? Me ardhjen në pushtet të dy partive të mëdha, opozita për herë të parë në Kosovë është bashkuar në veprimet e saj, të cilat po shihet se po prodhojnë situata jo të favorshme për shtetin si pasojë e dy marrëveshjeve të cilat nga opozita po vlerësohen të dëmshme, asaj të Asociacionit të komunave me shumicë serbe dhe Demarkacionit me Malin e Zi. Si mund të dilet nga kjo situatë? A shihni zgjidhje?

Bedri Islami: Është gjë e mirë që opozita në Kosovë është e bashkuar. Në fund të fundit, ky është edhe pikësynimi i çdo opozite kudo në botë, të ndërmarrë veprime dhe të shpallë synime, nëpërmjet së cilave do të jetë në pushtet. Megjithatë, synimi nga përcaktimi i mëtejshëm i asaj që ndërmerret, jo rrallëherë krijon një hapësirë politike e cila nuk mbushet dot me retorikë politike. Unë jam ndër ata që mendojnë se opozita duhet të respektohet deri në kufirin e mundshëm të jetës politike, ashtu si duhet të jetë e kundërta; opozita të përpiqet t’i gjejë urat e përbashkëta me Qeverinë në ato rrjedha ku mendon se shkon edhe e mbara e popullit që i ka votuar. Shteti nuk vuan se bashkohet opozita, por vuan kur nuk kupton nga ajo që ofron vizioni i saj. Opozita askund nuk ka mision përmbysjen. Nëpërmjet vizionit dhe ideve ajo duhet të gjejë atë rrugë që ua kthen besimin njerëzve dhe kjo rrugë nuk matet çdo ditë, por një herë në katër vjet.

Unë e kam cilësuar edhe më herët, në artikuj të ndryshëm, se nga këndvështrimi im politik opozita duhet ta zhvendosë protestën e saj në sheshe, por në parlament ta shpalosë vizionin e saj, mendimin e saj politik. Personalisht, si një njeri që pjesë të rëndësishme të jetës i ka lidhur me Kosovën, mendoj, e ky është krejtësisht mendimi im, që nuk ka lidhje me asgjë tjetër, se edhe vetë struktura brenda Qeverisë së Kosovës, sidomos brenda PDK-së, e di se miratimi i Asociacionit të komunave me shumicë serbe, apo Demarkacioni me Malin e Zi, nuk kërkojnë ngutje, se duhet të rishikohen qetësisht, sepse jo gjithherë opozita ka gabuar. Nga ana tjetër, jam i bindur se, edhe nëse nuk do të ishte ky shkaku i protestave, opozita do të gjente një kauzë tjetër, të cilën e ka dëshmuar prej kohësh.

Gjërat mund të zgjidhen nëse secila palë e di të vërtetën se Kosova nuk është as vetëm e Qeverisë, as vetëm e opozitës, as vetëm e shumicës parlamentare: është e të gjithëve. Aktualisht opozita shtron domosdoshmërinë e zgjedhjeve të reja, të parakohshme. Nëse do të pranohej ky precedent atëherë, pas pak kohe, një opozitë tjetër, cilado qoftë, do të kërkonte të njëjtën gjë, megjithëse askund në botë zgjedhjet e parakohshme nuk janë tabu. Nëse me protesta do të rrëzohej çdo qeveri, atëherë pak qeveri do të qëndronin në mandatin e tyre.

“Epoka e re”: A mendoni se ka qenë veprim i duhur i lidershipit të PDK-së që postin e kryeministrit t’ia lë LDK-së, sepse ka opinione të ndryshme se, po të ishte dikush tjetër nga PDK-ja në pozitën e kryeministrit, nuk do ta kishim këtë situatë?

Bedri Islami: Ndarja e posteve qeveritare, duke ia lënë postin e kryeministrit Lidhjes Demokratike, sidomos zotit Isa Mustafa, ishte një gjetje politike e detyrueshme, që solli pas vetes një gabim të ndjeshëm politik dhe që mund të kthehet në një faj politik. Por, theksoj, ishte e pa krye rruga në të cilën kishte hyrë Kosova pas zgjedhjeve të fundit. Partia Demokratike kishte fituar përvojë në drejtimin e shtetit të ri, kishte partneritet të ndjeshëm pozitiv, ishte partia fituese e zgjedhjeve të fundit politike në Kosovë, si e tillë mund të vazhdonte ta drejtonte vendin. Por, të mos gënjehemi, përsëri do t’i kishin përballë tyre protestat e opozitës sepse, edhe nëse do të kishim thjesht një bashkim PDK - LDK, ku postin e shefit të Qeverisë ta kishte PDK-ja, protestat do ta kishin gjithnjë një shkak. Është një aleancë e detyrueshme që nuk do të prodhojë mirësi për Kosovën. Shpresoj të jetë e përkohshme.

Por, edhe nëse do të kishim pasur një Qeveri VLAN, si quhej shkurtimisht, përsëri LDK-ja do të ishte aty, Isa Mustafa do të ishte kryetar i Kuvendit e, më pas, ndoshta presidenti i ri i Kosovës. Por, e vetmja gjë që do e përkrahja pa rezervë do të ishte se, në postin e shefit të Qeverisë do të ishte Ramush Haradinaj, një njeri që e do fort punën, që u shkon gjërave deri në fund dhe që do të qeveriste ku e ku më mirë se Isa Mustafa. Ideale për Kosovën do të ishte një qeveri e përbashkët e PDK-së me opozitën e sotme, por mëria politike, nganjëherë vetjake, qenka shumë e thellë.

“Epoka e re”: Cili është vlerësimi juaj për një vit të kësaj Qeverie, punës së saj që ka bërë deri më tani, dhe cili është edhe vlerësimi për punën e opozitës për periudhën e deritanishme?

Bedri Islami: Qeveria e sotme nuk mund të gjykohet, aq më pak të përgëzohet për atë që ka bërë për një vit, sepse në një vit, edhe po të vinte Obama apo Merkeli, nuk mund t’i zgjidhte hallet e Kosovës. E keqja është se Qeveria e ndjen veten si në kalim e sipër, pasi ka ardhur pas një marrëveshje fluturake, në të cilën synimet janë përcaktuar nga postet dhe pas së cilës ajo që ka humbur është PDK-ja. Në Qeverinë e tashme mungon vullneti për të bërë diçka të guximshme, për të dalë mbi veten e hallet e tyre vetjake. Pa dashje të rikthehem në një temë të rrahur edhe më herët, ajo që po ndodh sot me Qeverinë është se edhe vetë Qeveria nuk e beson se është në pushtet.

Opozita, nga ana tjetër, si çdo opozitë në këtë botë, e ka më të lehtë; ajo nuk gjykohet, ajo gjykon dhe, të gjykosh, është lehtë. Opozita ka pasur rastin të dëshmojë se ajo nuk hedh vetëm ide, por edhe realizon ide: mirëpo, edhe në Prishtinë, ku drejton njeriu i opozitës, nuk ka ndonjë gjë befasuese, jeta vazhdon si më parë, ndryshimet janë të pakta me atë që është pritur.

Askush nuk mund të mburret por, për më tepër, nuk mund të mburret pushteti i sotëm. Gjendja në Kosovë është rënduar, shpresa po shkon drejt shuarjes, besimi tek shteti po venitet, e faji nuk është jetim, as i vetëm njërës palë.

“Epoka e re”: Koalicioni qeverisës PDK - LDK muajin që vjen do ta zgjedhë edhe presidentin e vendit. Për këtë pozitë është lideri i PDK-së, Hashim Thaçi. Ju e njihini për së afërmi z. Thaçi. A do t’i bënte nder vendit që z. Thaçi të jetë president? Sa besoni ju se koalicioni qeverisës do të mund t’i sigurojë votat për ta bërë kuorumin për zgjedhjen e presidentit, sepse opozita pritet ta bllokojë seancën e Kuvendit, kurse disa deputetë të LDK-së kanë deklaruar se do të votojnë kundër Thaçit president?

Bedri Islami: Do ta shtroja pyetjen ndryshe: nëse nuk është Hashim Thaçi, kush do të jetë? Në të vërtetë jemi në një kohë kur Kosova nuk varet nga njëshi, por pyetja përsëri mbetet: cili gëzon besim më shumë se ai. Më vjen keq ta them, askush. Në Kosovë, tre liderët e opozitës së bashku, dy nga të cilët janë miq të mi të afërt dhe u besoj për gjithçka, nuk kanë aq vota sa kishte Thaçi në zgjedhjet e fundit. Nuk mund ta përmbysësh të vërtetën duke u thirrur në atë që mendon se do të ndodhë.

Hashim Thaçin e njoh prej 20 vjetëve, ashtu si i njoh shumë nga liderët e sotëm, të cilët, ose kanë ardhur drejtpërdrejt nga lëvizja çlirimtare, ose janë bërë pjesë e saj në vitet e mëvonshme. Thaçi ka pasur disa stacione në jetën e tij, në të cilën ka dëshmuar forcë karakteri, ashtu siç i ka edhe dritëhijet e tij në politikë. Mendoj se qëndrimi i tij në Konferencën e Rambujesë është një dëshmi vendosmërie dhe, duam apo nuk duam, këtë duhet ta themi. Ka disa etapa që lidhen me emrin e tij, edhe shpallja zyrtare e pavarësisë ka pjesë të veprimtarisë së tij politike. Harresa nuk është gjithnjë virtyt. Ashtu si nuk duhet harruar se, edhe në kohën e qeverisjes së tij si kryeministër, në Kosovë vazhduan të thellohen disa nga gërryerjet e mëdha të shoqërisë së atjeshme.

A do t’ia sigurojë kuorumin koalicioni qeverisës, këtë nuk e di sepse, si thashë më parë, ky është një koalicion i cili edhe vetë nuk e beson se janë bërë bashkë. Por, nëse sigurohet kuorumi, atëherë Thaçi do të jetë presidenti i ri i Kosovës.

E kam ruajtur qëndrimin tim për Thaçin, megjithëse jo gjithnjë ai ka pasur përmasat që kam menduar se do të kishte. Duke qenë i paanshëm në politikën e sotme, dhe duke mos kërkuar asgjë nga ajo politikë, absolutisht asgjë, më jepet e drejta ta shoh gjithë staturën e tij politike dhe mendoj se, sot, në këtë konfiguracion politik që ka Kosova, ai është më afër nga të gjithë drejt zgjedhjes së tij si president.

Opozita ende nuk ka një kandidat të saj. Ndoshta nuk do të ketë. Besoj më shumë tek kjo e fundit. Disa nga ata që sot aspirojnë më shumë kundër figurës politike apo njerëzore të Thaçit, e njohin atë më mirë se unë, kanë qenë dishepuj të tij, dhe është koha që qartas të dëshmojnë se pse, kur dhe në çfarë ndodhi transformimi i tij dhe i tyre.

Do të bëj një kalim në kohë. Disa vite më parë kam botuar tek ju një fejton të gjatë mbi jetën e Thaçit gjatë luftës, si e kisha njohur unë. Pak ditë më vonë isha në Prishtinë dhe u takova me miqtë e mi të vjetër, mes të cilëve ishte edhe njëri nga bashkëdrejtuesit e opozitës së sotme, të cilin e respektoj veçanërisht dhe i besoj, po ashtu. Më pyeti për fejtonin. Më tha në se e besoj atë që kisha shkruar. Iu përgjigja, po, e besoj. Përse?, më pyeti pastaj. Sepse të besoj Ty, i thashë, sepse këto që kam shkruar, dikur m’i ke thënë ti dhe të kam besuar. Nuk mund të të besoj dy herë ndryshe për të njëjtën gjë.

Thaçin e kandidon PDK-ja dhe, thonë se e mbështet një pjesë e rëndësishme e LDK-së. Më vjen keq që ai do të zgjidhet me votat e saj, por në politikë nuk ekziston e pamundura. Gjithkujt i është dukur absurde disa vite më parë, se një ditë dy nga figurat më pranë Thaçit, Limaj e Krasniqi, do të ishin sot përballë tij. Thaçi nuk është pa gabime, ai i ka bërë ato, dhe kjo është shenjë rritje e një njeriu të politikës. Por, kur ata ripërsëriten, duhen mësuar. Thaçi shpeshherë u ka besuar njerëzve të cilët nuk kanë besuar tek ai dhe nuk u ka besuar sa duhet atyre që kanë besuar tek ai. Në politikë njeriu nuk mund të rrijë pa ata që të fuqizojnë. Në politikë nuk mund të qëndrosh nëse shkëputesh nga ata që të sollën, sidomos familjet e luftës, veteranët dhe shokët e rezistencës. Në politikë nuk mund të thuash kurrë se i di të gjitha. Nuk është vetëm faji i tij. Shumë veta, edhe kolegë gazetarë, shikuan tek afrimi i tij rrugën drejt pushtetit, pasurimit, fshehjes së mëkateve, qofshin edhe familjare e, më pas, përsëri u kthyen ku kishin nisur. Besimi tek miqtë duhet të jetë pa kushte, pa inate, jo i verbër. E mendoni se si do të mund të ishte Kosova sot nëse do të qeverisej nga sindromi Thaçi - Haradinaj? Shumë vite më parë, unë vetë, kam bërë përpjekje për të pasur një bashkim të tillë, por mosbesimi ishte i thellë.

Sidoqoftë, duan apo nuk duan, sot për sot Hashim Thaçi është politikani më i votuar në Kosovë.

Nga vëzhgimet dhe informacionet e deritashme, jam i bindur se edhe diplomacia ndërkombëtare nuk e konteston kandidimin dhe zgjedhjen e tij. Ka pasur shumë fjalë dhe hamendësime se, pas lëshimeve që janë bërë në bisedimet me Serbinë, është garancia që i është ofruar Thaçit për të mos qenë i akuzuar nga Gjykata Speciale. Më e pakta nga të gjitha, kjo është miopi politike. Asnjë institucion serioz ndërkombëtar nuk bën pazare të tilla, sepse ata nuk janë gjykatat e prokuroria e Kosovës. Nuk njoh deri më tani asnjë institucion ndërkombëtar që të bëjë një marrëveshje të tillë e të thotë: shite Kosovën dhe të lëmë të lirë. Institucionet ndërkombëtare, sidomos të sigurisë dhe të drejtësisë, nuk janë busulla e marrëveshje bakallësh.

Jam i bindur se jo shumë larg do të qeverisë edhe opozita e sotme. Ose pjesë të saj. Rotacioni politik në qeverisje e forcon një vend. Nuk do të trembesha nga ardhja në pushtet e opozitës. Kjo do ta bëjë më të menduar pushtetin e sotëm. Një shumicë qeverisëse që nuk e ka drojën nga opozita ajo humbet shumë shpejt.

“Epoka e re”: Opozita dhe një pjesë e shoqërisë civile kandidaturën e Thaçit për president e konsiderojnë jounifikuese?

Bedri Islami: Të jemi të sinqertë, në cilin vend të botës një njeri i politikës është edhe faktor unifikues. Askund. Do të kisha dashur që president i Kosovës të jetë një figurë madhore, si Rexhep Qosja, Adem Demaçi apo dikush tjetër i këtyre përmasave, por përsëri nuk mund të jenë unifikues. Askush nuk mund të presë që Thaçi, si president, duke përfaqësuar popullin e Kosovës, do të jetë edhe unifikues mes palëve. Koha e personaliteteve të mëdha unifikuese ka shkuar, por bashkëqeverisja mes forcave të ndryshme ka kohën e vet. Unë uroj që kjo kohë të vijë sa më shpejt në Kosovë dhe, ndershmërisht, do të ëndërroja për një qeveri ndryshe, ku domosdo të ishte edhe PDK-ja. Disa gjëra, pavarësisht se je larg, nuk të hiqen nga shpirti. Por, mjerisht, trishtohem thellësisht për dy gjëra madhore: shkallën e lartë të korrupsionit në Kosovë dhe ndarjen politike të njerëzve që bashkërisht bënë luftën çlirimtare.

Kosova nuk ka më personalitete të mëdha si Adem Jashari, Fehmi Lladrovci, që mund të ishin unifikues. Ta pranojmë këtë. Nëse Thaçi është më i votuari në Kosovë, do të thotë se ka qasjen më të ndjeshme ndaj unifikimit. Dhe duhet pranuar si i tillë, derisa të kemi një qasje tjetër.

“Epoka e re”: Mediet e huaja këto ditë kanë raportuar, pastaj është përcjell edhe në mediet shqiptare, se ish-shefi i shërbimit francez, Pierre Siram, në një dokument të tij, thotë se Hashim Thaçi është agjent i Francës. Pse në këtë periudhë lëshohen deklarata të tilla? Sa mund ta zbehin figurën e Thaçit?

Bedri Islami: Kosova sot po “harbohet” nga bashkëpunëtorët e shërbimeve të huaja. Përgjithësisht njerëzit e politikës shqiptare, kudo që janë, gjithandej, po dalin agjentë. Nuk është e re dhe as nuk do të ndalohet këtu. Në tridhjetë vjetët e fundit “bollëku” i agjentëve ka qenë aq i shumtë saqë figura të njohura udbashe deri në palcë po duken si engjëllorë. Është sulmuar si i tillë Jusuf Gërvalla, më pas Ibrahim Kelmendi, pas tij Ali Ahmeti, Fazli Veliu, Musa Xhaferi, Xhavit Haliti, nesër do të dalin të tjerë, një ditë mund të ketë përsëri “fakte” për ndonjë lider që punuaka për Rusinë dhe i vijnë paratë nga qendrat radikale islamike. Kjo do të thotë se lëvizja çlirimtare në Kosovë dhe në viset e tjera shqiptare nuk paska qenë gjë tjetër, veçse një shërbim i të huajve për t’i hequr ata nga pushteti dhe nga pushtimi. Nuk ka personalitet të ndriçuar që nuk është përbaltur për të hequr një pjesë të shpirtit rezistues.

Mendoni se ai, Thaçi, do t’i kishte rrugët kaq të hapura nëse do të kishte qenë agjent i një shërbimi të huaj? Nuk është e lehtë t’i hapësh dyert e diplomacisë ndërkombëtare dhe të pranohesh aty. Sepse mund të futesh një herë a dy, por herën e tretë nuk të afrojnë as në oborr.

Mendoj se është koha të kuptojmë të vërtetën nga ajo që na është hedhur për t’u besuar si e vërtetë. Nuk besoj se deklaratat e tashme do ta dëmtojnë figurën politike të Thaçit. Pasi, po të analizohen me qetësi, edhe në këto deklarata ka aq shumë pasaktësi, saqë është e lehtë të saktësohen gjërat.

Zgjedhja ose jo e Hashim Thaçit president i ardhshëm i Kosovës është çështje e parlamentit, sidomos e dy partive kryesore dhe e minoriteteve. Do të kisha dashur me gjithë shpirt që presidenti i Kosovës të zgjidhej me votat e parlamentarëve shqiptarë. Nëse Hashim Thaçi do të zgjidhej kështu e, si duket, kështu do të ndodhë, krahas bekimit diplomatik ndërkombëtar, unë do t’i uroja suksese.

(Mal Qorraj)

[/size]

Gjenerali i ushtrisë shqiptare, Kudusi Lama, e ka përkrahur kandidaturën e Hashim Thaçit për president të Republikës së Kosovës.

Ai ka thënë se kandidatura e Thaçit për president i bën nder Kosovës. Në këtë intervistë për “Epokën e re”, Lama ka thënë se Thaçi gjatë jetës së tij e ka dëshmuar veten si një luftëtar i devotshëm për lirinë e atdheut dhe si një udhëheqës i përgjegjshëm për ta bërë Kosovën një vend më të mirë për qytetarët e saj. “Konsideroj se kandidatura e tij i bën nder Kosovës. Është një personalitet që në jetën e tij është evidentuar si një luftëtar i devotshëm për atdheun e kombin. Ka luftuar për ta bërë Kosovën të lirë. Ka udhëhequr për ta bërë Kosovën një vend të mirë për të jetuar qytetarët e lirë. Ka dhënë prova se në çaste të vështira është i qëndrueshëm si luftëtar i Ushtrisë Çlirimtare, si drejtues i delegacionit të Kosovës në konferencën ndërkombëtare në Rambuje, si kryetar i Qeverisë së përkohshme të Kosovës gjatë e pas luftës çlirimtare etj”, ka thënë Lama.
Ai i ka mohuar pretendimet e opozitës se lideri i PDK-së është një figurë përçarëse për postin e presidentit. Sipas tij, Hashim Thaçi i ka përmasat e një burrë shteti që di të bëjë politikë, që di t’i mbledhë rreth vetes qytetarët e Kosovës dhe që di të merret vesh edhe me faktorin ndërkombëtar. “Pavarësisht çfarë thuhet kafeneve, mendoj se Hashim Thaçi dje në luftë ishte një djalë me pushkë, që ishte rreshtuar në radhët e Ushtrisë Çlirimtare të Kosovës me një mendje, të luftonte e ta gëzonte lirinë e vendit të tij ose të binte në altarin e kombit për ta fituar të tjerët atë liri. Çdo mendim tjetër për të është abuzim. Jam i sigurt se ajo luftë, pjesë e së cilës ishte edhe Hashim Thaçi, është plotësisht e pastër”, është shprehur ai, duke shtuar se është krenari ta shohësh duke udhëhequr Kosovën një ish-luftëtar të Ushtrisë Çlirimtare të Kosovës.
Më tutje, Lama është shprehur kundër mbajtjes së zgjedhjeve të parakohshme, ndonëse ka kërkuar rishqyrtimin e marrëveshjeve për Asociacionin dhe Demarkacionin. Sipas tij, një gjë e tillë duhet të bëhet në Kuvend ose nëpërmjet referendumit. Lama ka vlerësuar se nuk do të ndihej fare i lumtur nëse kjo krizë politike do të zgjidhej nga faktori ndërkombëtar.

“Epoka e re”: Z. Lama, edhe ky vit i gjeti partitë politike të përçara rreth dy marrëveshjeve të cilat po i kundërshton opozita: Marrëveshjes së Asociacionit dhe të Demarkacionit. A mendoni se do të duhej të ketë reflektim nga njëra palë dhe të mos shkohet me kërkesa për zgjedhje të parakohshme?
Lama: Demokraci do të thotë: pushtet i popullit, por duket se partitë politike popullin po e shfrytëzojnë thjesht si letër me vlerë, për t’i përmbushur interesat e individëve që i përbëjnë ato. Realisht mua partitë politike po më ngjajnë si kompani biznesi, ku avancimet bëhen sipas njohjeve dhe lidhjeve farefisnore e jo sipas vlerave. Duke krijuar një mendim të tillë, është e vështirë të thuash se cila është e vërteta në një ndeshje midis partive politike, siç po ndodh prej disa muajsh edhe në Kosovë.
Kurrë nuk kisha menduar se politikanët tanë do ta harrojnë rrugën nga kemi ardhur deri tek liria. Por, aktualisht situata është mjegulluar në atë mënyrë, sa të mos kuptohet se çfarë po ndodh. As që kuptohet kush ka të drejtë e kush jo. Kush është atdhetar e kush po ia vë minat atdheut, ndoshta pa kuptuar cila është e drejta.
Flasin në emër të atdheut individë, që asnjë hap nuk e kanë bërë gjatë jetës së tyre për t’i shërbyer atij; akuzohen ata që deri dje gjithë jetën e kanë vënë në shërbim të atdheut; quhen të mirë ata që i akuzojnë luftëtarët e atdheut; u atribuohen vlera atyre që i akuzojnë luftëtarët e kombit; të gjithë merren me thashetheme, si të ishin në kafene; asnjë nuk është bashkues dhe paqësor në dhënien e mendimeve dhe të alternativave të zgjidhjes së problemeve që kanë lindur. Gjithë kjo pamje nuk është në interes të atdheut e të shtetit të Kosovës, as në interes të popullit që ka synime të jetojë i qetë, i sigurt dhe i lumtur në të ardhmen e tij, duke kontribuuar me gjithë fuqinë e tyre.
Praktikisht, nëse do të ekzistonte mirëdashja, do të gjendej edhe mirëkuptimi, edhe rruga e zgjidhjes. Por, duket se secili po synon të imponojë, që të thotë nesër se “a e kuptuat që unë isha më i fuqishëm?” Në vend që secili të punojë, që të jetë krenar edhe duke qenë në fund të rreshtit, por funksional në zgjidhjen e nevojshme. E, ndoshta, duke qenë në fund, mund të kryhen detyra të mëdha. Ndërsa siç po shkohet me mendimin, që unë të jem në krye, pa s’ka rëndësi sa veta kam prapa, nuk mund të krijohet forca as për sot e as për sigurinë e së ardhmes.
Për sa ui përket marrëveshjeve të Asociacionit dhe Demarkacionit (Bashkimit të komunave serbe dhe caktimit të kufijve midis Kosovës e Malit të Zi), mbetem me mendimin që e kam shprehur edhe më herët. Ato marrëveshje duhen rishqyrtuar, duke marrë përfundimisht vendimin ose në parlament me konsensus, ku të gjendet mirëkuptimi prej të gjithë deputetëve, pavarësisht përkatësisë partiake, ose të mbahet referendum, ku të shprehet populli nëse duhen pranuar ato marrëveshje ose jo.
Për sa iu përket zgjedhjeve të parakohshme, ato unë i konsideroj thjesht angazhim i tepruar dhe shpenzime të panevojshme të burimeve financiare të mbledhura nga taksapaguesit e Kosovës. E kam këtë mendim, pasi vlerësoj se nuk do të ketë një ndryshim të shumicës aktuale edhe po të mbahen zgjedhje. Përkundrazi, zgjedhjet do të jenë thjesht një rikonfirmim mandati për shumicën aktuale, duke zhvlerësuar opozitën dhe duke e pavlerësuar atë në periudhën pas zgjedhore. Realisht nuk i kuptoj opozitarët që kërkojnë zgjedhje të parakohshme, sepse mua nuk më del llogaria që nëpërmjet tyre mund të ndryshohet raporti i forcave.
Zgjedhjet unë nuk i quaj zgjidhje. Zgjidhjen do ta kishte dhënë tashmë Gjykata Kushtetuese në qoftë se do ta kishte shprehur vendimin e saj me gjuhë të saktë, jo të zbutur. Vendimi i kësaj gjykate, as mish as peshk, në vend se të jepte zgjidhje përfundimtare, veçse i ka ndezur gjakrat. Ndjej keqardhje që kjo gjykatë nuk e vuri veten në rolin që duhet të luante. Në këto kushte po shihet një qeveri e paaftë për t’i kryer detyrat e saj dhe një opozitë e paaftë për ta ndalur atë e për ta zëvendësuar me një tjetër më të mirë. Prandaj do të mendoja, që të dyja palët duhet të kërkojnë e ta gjejnë veten. E për këtë në radhë të parë duhet marrë vendimi, që këto marrëveshje janë të pavlefshme pa konsensusin parlamentar. Këtë vendim mund ta marrë kryesia e parlamentit. Dhe unë nuk kuptoj pse nuk është marrë një vendim i tillë. Kjo është fare e thjeshtë. Kështu mund të ecet. Ashtu sikurse mendoj që duhet të hiqet dorë nga mendimi se pushteti është privilegj. Të kuptohet përfundimisht, se të jesh në pushtet, do të thotë të jesh në shërbim të atyre që të kanë zgjedhur.

“Epoka e re”: A mund ta zgjidhë këtë situatë faktori ndërkombëtar?
Lama: Nuk do të isha fare i lumtur po të shikoja që do të na i zgjidhë dikush nga Evropa konfliktet tona, të cilat mund dhe duhet t’i zgjidhim vetë. Në Kosovë ka mjaft intelektualë që mund të japin zgjidhje jo vetëm për problemet që lindin në Kosovë, por edhe për problemet madhore të botës së sotme. E keqja është se sot nuk po pyeten ata me qetësi e në mënyrë të organizuar, pa presion pushtetar, që t’i shprehin mendimet e tyre e t’i japin alternativat profesionale e politike. Jam i sigurt, se po të vijë dikush nga Evropa për të na udhëhequr drejt zgjidhjeve të mundshme të kësaj situate, ai do të jetë ndonjë mediokër, që në vendin e tij nuk do ta njohë askush. Këtë do ta konsideroja fyerjen më të madhe kombëtare. Nuk di sa do të ndihen të fyer politikanët tanë.

“Epoka e re”: Kosova në muajin shkurt duhet ta zgjedhë presidentin e ri. Për këtë pozitë kandidat është lideri i PDK-së, Hashim Thaçi. A mendoni se në këto rrethana të sotme ish-udhëheqësi politik i UÇK-së është personi i duhur për president të vendit?
Lama: Më lumturon fakti që tashmë Kosova ka të drejtën ta zgjedhë kryetarin e saj pa ia diktuar atë të tjerët. Zgjedhja e kryetarit të Kosovës këtë vit është një eveniment i veçantë, pasi shpresoj se për herë të parë të kemi një kryetar shteti, të zgjedhur me dëshirë e pa asnjë imponim.
Unë nuk e di sa kandidatura do të jenë për ta marrë detyrën e kryetarit të shtetit, por nëse mes tyre do të jetë edhe kandidatura e Hashim Thaçit, konsideroj se kandidatura e tij i bën nder Kosovës. Është një personalitet që në jetën e tij është evidentuar si një luftëtar i devotshëm për atdheun e kombin. Ka luftuar për ta bërë Kosovën të lirë. Ka udhëhequr për ta bërë Kosovën një vend të mirë për të jetuar qytetarët e lirë. Ka dhënë prova se në çaste të vështira është i qëndrueshëm si luftëtar i Ushtrisë Çlirimtare, si drejtues i delegacionit të Kosovës në konferencën ndërkombëtare në Rambuje, si kryetar i Qeverisë së përkohshme të Kosovës gjatë e pas luftës çlirimtare etj. Pavarësisht çfarë thuhet kafeneve, mendoj se Hashim Thaçi dje në luftë ishte një djalë me pushkë, që ishte rreshtuar në radhët e Ushtrisë Çlirimtare të Kosovës me një mendje, që të luftonte e ta gëzonte lirinë e vendit të tij ose të binte në altarin e kombit për ta fituar të tjerët atë liri. Çdo mendim tjetër për të është abuzim. Jam i sigurt se ajo luftë, pjesë e së cilës ishte edhe Hashim Thaçi, është plotësisht e pastër. E ta shohësh një luftëtar të Ushtrisë Çlirimtare të Kosovës në detyrën e kryetarit të Kosovës është krenari.

“Epoka e re”: Pse, sipas jush, Hashim Thaçi duhet të jetë president i Kosovës?
Lama: Mendoj se Hashim Thaçi i ka përmasat e një burri shteti që di të bëjë politikë, që di t’i mbledhë rreth vetes qytetarët e Kosovës dhe që di të merret vesh edhe me faktorin ndërkombëtar. Fakti që edhe duke ardhur nga lufta, ai me bashkëluftëtarët e tij arritën të krijojnë një parti të fuqishme siç është Partia Demokratike e Kosovës, e cila në rrugën e saj ka evidencuar suksese të mëdha dhe ka marrë simpatinë e pjesës më të madhe të popullit të Kosovës, duke arritur deri tek të fituarit e vendit të parë në tri palë zgjedhje, në raport me partitë e tjera, është një tregues edhe i fuqisë udhëheqëse të Hashim Thaçit.

“Epoka e re”: Opozita është duke e kundërshtuar zgjedhjen e Thaçit president. Madje pjesë e opozitës janë edhe dy liderë të luftës çlirimtare, z. Haradinaj dhe z. Limaj. Opozita z. Thaçi po e konsideron si figurë përçarëse për ta marrë postin e presidentit. Sa do të mund ta luante rolin unifikues si president, z. Thaçi?
Lama: Të pretendohet se do të gjejmë një engjëll që ta marrë detyrën e kryetarit të Kosovës më duket e pamundur. Nuk besoj se as këta që shprehen momentalisht kundër kanë një mendim të tillë, se vërtet do të mund të kemi një engjëll kryetar të Kosovës. Ne do të kemi për kryetar të Kosovës një nga njerëzit kontribuues për bërjen e këtij shteti të lirë e të pavarur. Një arritje e tillë sigurohet duke zgjedhur pikërisht një nga ata që kanë treguar vlera në rrugën e bërjes së Kosovës së lirë.
Unë nuk do t’i kontestoja edhe Ramush Haradinajn a Fatmir Limajn po të kandidonin për kryetar të Kosovës, por meqenëse ata sot nuk i kanë vënë kandidaturat e tyre, nuk besoj se do të duan që Kosovën ta lënë pa kryetar, pasi ata edhe pikërisht për këtë kanë luftuar, që ky vend të udhëhiqet nga shqiptarët e lirë.
Më duket i paqëndrueshëm arsyetimi, nga kushdo që e shpreh, se Hashim Thaçi është figurë përçarëse. Unë di që ai deri tani është kryetar i Partisë Demokratike të Kosovës. Si i tillë, ai ka për mision t’i mbrojë interesat e partisë që udhëheq përballë partive të tjera. Ndërsa se si dhe sa mirë apo keq e ka udhëhequr këtë parti, nuk mund ta vlerësojnë ata që janë në opozitë me të. Një kritikë të tillë mund e duhet t’ia bëjnë ata që udhëhiqen prej tij, pra anëtarët e partisë demokratike. Ndërsa si drejtues e bashkues i gjithë politikës dhe qytetarëve të Kosovës, ai vlerësimin mund e duhet ta marrë duke qenë në funksionin e kryetarit të Kosovës. Në qoftë se nga ai funksion do të mbetet i njëanshëm dhe do ta vlerësojë vetëm partinë prej së cilës ka ardhur, ai do të jetë vërtet një njeri që nuk do të fitojë vlera si drejtues i shtetit. Por, në qoftë se ne e paragjykojmë në mënyrë paraprake, do të biem në nivel të ulët dhe nuk vlen që ky opinion të merret në konsideratë. Unë di që gjatë luftës ka treguar se di t’i bashkojë luftëtarët, ashtu edhe në Rambuje, në drejtimin e Qeverisë së përkohshme etj.

“Epoka e re”: Deri më tani Kosova ka pasur disa presidentë, por asnjëri prej tyre nuk ka pasur ndonjë trashëgimi të drejtpërdrejtë të UÇK-së. Çfarë do të thoshte për Kosovën zgjedhja e Thaçit president?
Lama: Pa paragjykuar asnjë, do të thosha që një kryetar i Kosovës, i dalë nga radhët e Ushtrisë Çlirimtare, do të thotë siguri më e plotë. Unë e kuptoj që edhe luftëtarët janë njerëz të zakonshëm si gjithë të tjerët. Prandaj edhe nuk pretendoj që të zgjedhurit nga luftëtarët do të jenë pa asnjë të metë. Por, jam i sigurt, që një kryetar luftëtar ka më shumë siguri, ashtu siç edhe ka më shumë përgjegjësi, pasi merr përgjegjësinë ta udhëheqë politikën e shtetit dhe ta përfaqësojë atë në arenën ndërkombëtare, duke bërë figurën e duhur, për të dhënë mesazhet e synimeve për të ardhmen, duke u bërë partner i respektuar prej të tjerëve e duke synuar rritjen e vlerave të vendit që përfaqëson.
Populli shqiptar, në veçanti shqiptarët në trojet e pushtuara nga sllavët e Ballkanit, kanë bërë luftë pa ndërprerje ndër kohë. Nuk mund të thuhet se kur është bërë më e rreptë qëndresa. Por, vlerësoj se vetëm Ushtria Çlirimtare e Kosovës arriti ta rreshtojë popullin e të gjitha trevave të saj në luftë kundër pushtuesit. E ata që ndërtuan këtë strategji politiko-ushtarake, e cila solli në fitore atë ushtri dhe ia dha vendit lirinë, patjetër se do të dinë t’i bëjnë mirë edhe strategjitë e politikave të sigurisë, duke përfshirë, si politikat zhvillimore, ato të bashkëpunimit ndërkombëtar e integrimit, të zbatimit të ligjit, të arsimimit e shëndetit të popullit, të rendit e të mbrojtjes së atdheut, të kulturës e të trashëgimisë etj. Duke vlerësuar prej këtij këndvështrimi, konsideroj se zgjedhja e kryetarit prej radhëve të luftëtarëve është një vlerë e shtuar për Kosovën dhe një siguri më shumë për të ardhmen e saj.

Muhamet KOCI

Thaçi gëzon më shumë besim për president

Thaçi gëzon më shumë besim për president

Re: Thaçi gëzon më shumë besim për president