Iu shitën punimet para se ti ekspozojë

Anila LIMANI


Grafisti nga Gostivari, Burhan Ahmeti prezanton Maqedoninë në ekspozitën e artistëve figurativ evropian. Ekspozita me titull “Anti Thesis”, çelet të martën në mbrëmje në “Trigono gallery Athine”. Punimet e Ahmeti janë shitur me një çmim të volitshëm para se të hapet ekspozita, por do t’i jepen blerësve pas përfundimit të saj. Kuratori i ekspozitës, piktori i njohur grek, Vassilis Karakatsanis, pasi ka parë në web faqe punimet e Burhan Ahmetit, i është lutur atij, që brenda mundësive të bëhet pjesë e ekspozitës madhështore që ka qenë duke përgatitur. “Piktori Karakatsanis, kish vizituar web faqen time dhe sipas emailit që ma dërgoi, i kishin lënë përshtypje punimet e mia (grafikat), dhe më kish dhënë një vlerësim pozitiv. Ai më tregonte për një ekspozitë madhështore, të cilën ishte duke e organizuar në Athinë me artistë figurativë Evropian”, tregon artisti për “Lajm”. Ahmeti sqaron, se piktori grek, po ashtu i ka shkruar që brenda mundësive, për një periudhë të përshpejtuar kohore të dërgoj disa punime përmes postës me qëllim që edhe ai të mund të jetë pjesë e kësaj ekspozite. “Kërkesën e tij e pranova me gjithë qejf dhe të nesërmen i dërgova me postë të shpejtë tre grafika duke ua dhënë edhe vlerën e tyre, dhe për disa ditë, kuratori i ekspozitës mu lajmërua se kishin arritur”. Punimet e Burhanit të realizuara në teknikën e akuatintës i kishin pëlqyer edhe më tepër kuratorit Karakatsanis, kur i kish parë origjinale. “Më befasoi fakti kur më tha se, jo vetëm që i kishin pëlqyer pa masë punimet e mia kur i kishin parë drejtpërsëdrejti, por edhe se të tria grafikat janë të shitura para hapjes së ekspozitës, edhe atë me çmim të volitshëm”, thotë Ahmeti. Ndërkaq, në web faqen e galerisë “Trigono”, gjenden emrat e të gjithë pjesëmarrësve të ekspozitës “Anti Thesis” dhe ato janë: Athina Antoniadou ( Cyprus / Germany ), Rea Afantitou ( Cyprus ), Burhan Ahmeti (Former Yugoslavian Republic of Macedonia ), Marianna Constanti (Cyprus), Luís Deza (Perú / Sweden), Genti Korini (Albania), Iseult Labote (Switzerland), Juanjo Oliva (Spain), Frixos Papantoniou ( Cyprus / United Kingdom ), Alain Pette (France), Olga Popescu (Romania), Daniel Stancu (Romania), Ina Katarina Strömberg (Sweden), ‘Two Four Two’ Costas Mantzalos & Constantinos Kounnis (Cyprus). Ekspozita e çelur më 18 mars do të jetë e hapur për vizitorët deri më 19 prill.