Eurodeputetët: Të shpëtojmë “Schengen”-in, duke dëbuar emigrantët “ekonomikë”

Në një kohë tepër të turbullt për zonën e lëvizjes së lirë, eurodeputetët kanë bërë thirrje për masa të rrepta kundër emigracionit, në mënyrë që të shpëtohet zona “Schengen”.

Kriza më e rëndë e refugjatëve dhe emigrantëve që ka prekur Europën, që prej Luftës së Dytë Botërore, ka bërë që të rikthehen kontrollet në disa prej kufijve të brendshëm të Bashkimit Europian, përfshi edhe pak kilometra tej nga vendi ku ishin mbledhur politikanët, në Parlamentin Europian, në Strasburg.

“Nëse dikush mbërrin në Strasburg nga Gjermania, me siguri që duhet të presë të ndalohet për kontroll nga policia në vendin simbolik të quajtur ‘Ura e Europës’”, thotë Sandor Zsiros, reporter i “Euronews”. “Shumë njerëz janë të frikësuar se, epoka e lëvizjes së lirë brenda unionit mund të marrë fund së shpejti”.

Duke qenë se kriza e emigrantëve mbetet parësore në axhendën politike të BE-së, një eurodeputet holandez tha se të ashtuquajturit emigrantë “ekonomikë” duhet të përjashtohen dhe të kthehen mbrapsht, në mënyrë që të ruhet mbështetja e publikut për njerëzit që u largohen zonave të luftës.

“Ne mund ta vazhdojmë këtë mbështetje vetëm për të mirëpritur refugjatë, ndërkohë që për ata njerëz që nuk janë refugjatë, por që konsiderohen si emigrantë ekonomikë nga vendet jashtë Europës, duhet zbatuar kthimi mbrapsht”, tha Kati Piri. “Duhet të kemi një politikë më të rreptë kundrejt emigrantëve, në mënyrë që të mbetemi në gjendje të presim refugjatë të tjerë në Europë”.

Me mijëra emigrantë kanë mbërritur në Europë gjatë kohëve të fundit, teksa mbi 60 mijë kanë zbritur në Greqi pas udhëtimeve me varka të papërshtatshme për lundrim nga Turqia vetëm gjatë muajit të kaluar.

Një eurodeputete gjerman e “të gjelbërve” nënvizon rëndësinë e mbrojtjes së kufijve brenda dhe jashtë BE-së. “Duhet të menaxhojmë më mirë situatën në kufijtë e jashtëm të unionit. Kjo gjë është rënë dakord mes nesh dhe duhet të zhvillohet në të ardhmen si një përgjegjësi e përbashkët”, tha Rebecca Harms për “Euronews”. “A do të jemi në gjendje të vulosim kufijtë tanë të jashtëm? A dëshirojmë ta bëjmë diçka të tillë? Unë do të thoja jo”.

Në Parlamentin Europian u diskutua gjithashtu menaxhimi i shumëpërfolur, që Greqia po u bën ditët e fundit kufijve të saj. Rekomandimet e reja i kërkojnë Athinës që të veprojë në përputhje me rregullat e zonës “Schengen”, ku përfshihen procedurat e regjistrimit të refugjatëve, skanimi i shenjave të gishtërinjve, e njëherazi verifikimi i ndonjë lidhjeje të tyre me terrorizmin.

/ Top Channel